IPL 2023 Final CSK vs GT : વિશ્વની સૌથી મોટી T20 લીગ એટલે કે IPLની ફાઇનલ મેચ 28 જૂને અમદાવાદના નરેન્દ્ર મોદી સ્ટેડિયમ ખાતે ભારતીય સમય અનુસાર સાંજે 7.30 કલાકથી રમાશે. આ સિઝનમાં 70 લીગ મેચો, બે ક્વોલિફાયર અને એક એલિમિનેટર રમ્યા બાદ, CSK અને ગુજરાત ટાઇટન્સ ફાઇનલમાં પહોંચી છે. હવે વિશ્વભરના ક્રિકેટ ચાહકોની નજર એમએસ ધોની અને હાર્દિક પંડ્યા પર ટકેલી છે કે, કોણ પોતાની ટીમને ચેમ્પિયન બનાવવામાં સફળ રહેશે.
એમએસ ધોની માટે આ સિઝન વધુ ખાસ છે, કારણ કે જો તે જીતશે તો તે પોતાની ટીમને સૌથી વધુ વખત ચેમ્પિયન બનાવનાર કપ્તાન બની જશે અને રોહિત શર્માની બરાબરી કરી લેશે. બીજી તરફ, હાર્દિક પંડ્યાની ટીમ વર્તમાન ચેમ્પિયન છે અને તે CSK સામે પોતાનું ટાઇટલ બચાવવાનો પ્રયાસ કરશે.
એમએસ ધોની 8મા કેપ્ટન સામે ફાઈનલ મેચ રમશે
એમએસ ધોની આ લીગમાં 2008થી એટલે કે IPLની પ્રથમ સિઝનથી રમી રહ્યા છે અને 16 સિઝનમાંથી 14 સિઝનમાં તે CSKનો કેપ્ટન રહ્યા છે. 14 સીઝનમાં CSKની ટીમ 10 વખત ફાઇનલમાં પહોંચી છે અને દરેક વખતે આ ટીમ ધોનીની કેપ્ટન્સીમાં ફાઇનલમાં રમી છે. એમએસ ધોનીની નજર હવે ફાઇનલમાં 8મા કેપ્ટન સામે ટાઈટલ જીતવા પર રહેશે.
હાર્દિક પંડ્યા પહેલા ધોની આઈપીએલ ફાઈનલમાં શેન વોર્ન, સચિન તેંડુલકર, ડેનિયલ વેટોરી, ગૌતમ ગંભીર, રોહિત શર્મા, કેન વિલિયમસન, ઈયોન મોર્ગન જેવા કેપ્ટનો સામે ટાઈટલ જીતી ચૂક્યો છે. હાર્દિક પંડ્યા આઠમો કેપ્ટન હશે જેની સામે ધોની ફાઈનલ રમશે. IPLમાં ધોની ત્રણ વખત કેપ્ટન તરીકે રોહિત શર્મા સામે રમ્યો છે.
આઈપીએલ ફાઇનલમાં એમએસ ધોનીના વિપક્ષી કેપ્ટન
2008માં શેન વોર્ન
2010માં સચિન તેંડુલકર
2011માં ડેનિયલ વેટોરી
2012માં ગૌતમ ગંભીર
2013માં રોહિત શર્મા
2015માં રોહિત શર્મા
2018 માં કેન વિલિયમસન
2019 માં રોહિત શર્મા
2021માં ઈયોન મોર્ગન
2023માં હાર્દિક પંડ્યા
આ પણ વાંચો – વિરાટ કોહલી આઈપીએલમાં સૌથી વધારે સદી ફટકારનાર ખેલાડી બન્યો, ક્રિસ ગેઇલનો રેકોર્ડ તોડ્યો
શું ગુજરાત IPL ટાઇટલ બચાવી શકશે?
ગુજરાતની ટીમ શાનદાર રમત બતાવી રહી છે, પરંતુ હાર્દિક પંડ્યાની ટીમ ચેન્નાઈ સુપર કિંગ્સ સામે ટકરાવાની હોવાથી, શું આ વખતે પોતાનું ટાઈટલ બચાવી શકશે કે કેમ તે મોટો પ્રશ્ન છે. CSKએ પ્રથમ ક્વોલિફાયરમાં ગુજરાતને હરાવ્યું હતું અને ગુજરાતને ફાઇનલમાં પહોંચવા માટે મુંબઈ ઈન્ડિયન્સ સામે બીજી ક્વોલિફાયર રમવી પડી હતી. જો કે, જો ગુજરાત આ સિઝનમાં પણ ટાઈટલ જીતે છે, તો તે CSK અને મુંબઈ પછી સતત બીજી વખત ટાઈટલ જીતનારી IPLની ત્રીજી ટીમ બની જશે. અગાઉ, CSKએ વર્ષ 2010-11માં જ્યારે મુંબઈ ઈન્ડિયન્સે 2019-20માં સતત બે વખત ખિતાબ જીત્યો હતો.
