વિમાનોમાં બોમ્બની અફવાઓ અંગે સરકાર કડક, સોશિયલ મીડિયા કંપની પાસે સહકાર માંગ્યો

મંત્રાલયે શું કહ્યું?

કેન્દ્રીય ઈલેક્ટ્રોનિક્સ એન્ડ ઈન્ફર્મેશન ટેકનોલોજી મંત્રાલય (એમઈઆઈટીવાય)એ એક નિવેદન બહાર પાડીને જણાવ્યું હતું કે એરલાઈન્સને આ પ્રકારની બોમ્બની ધમકીઓ રાજ્ય માટે પણ ખતરારૂપ છે, મંત્રાલય કડક શબ્દોમાં કાર્યવાહી કરવાની વાત કરી રહ્યું છે.

મંત્રાલયે એક્સ, ફેસબુક, સોશિયલ મીડિયા મધ્યસ્થીઓને આઇટી નિયમો 2021 હેઠળ તાત્કાલિક જરૂરી કાર્યવાહી કરવા જણાવ્યું છે. જેથી કોઈ પણ ઉપયોગકર્તાને કોઈપણ ગેરકાયદેસર અથવા ખોટી માહિતીને હોસ્ટ કરવા, પ્રદર્શિત કરવા, અપલોડ કરવા, સુધારવા, પ્રકાશિત કરવા, ફેલાવવા, સંગ્રહ કરવા, અપડેટ કરવાની અથવા શેર કરવાની મંજૂરી આપવામાં ન આવે.

આ પણ વાંચો – કેપ્ટન અમરિંદર સિંહે કહ્યું – ભારત-કેનેડાના સંબંધો ખૂબ જ મૈત્રીપૂર્ણ હતા, ટ્રુડોએ બર્બાદ કરી દીધા

મંત્રાલયે કહ્યું કે સોશિયલ મીડિયા મધ્યસ્થીઓ (એક્સ, ફેસબુક) સહિત બધાએ પોતાના પ્લેટફોર્મ પર બોમ્બ-ધમકીઓ સહિતના આવા દૂષિત કૃત્યોને પ્રસારિત થતા રોકવા માટે યોગ્ય પ્રયાસો કરવા જોઈએ.

સતત સામે આવી રહ્યા છે આવા કેસો

છેલ્લા 11 દિવસમાં ભારતીય એરલાઈન્સની લગભગ 250 ફ્લાઈટને બોમ્બથી ઉડાવી દેવાની ધમકી મળી છે. ઈન્ડિગોના પ્રવક્તાએ ગુરુવારે એક નિવેદનમાં જણાવ્યું હતું કે કંપનીને 20 ફ્લાઇટ્સ માટે સુરક્ષા સંબંધિત ચેતવણી મળી છે.

અકાસા એરના પ્રવક્તાએ જણાવ્યું હતું કે તેમની 13 ફ્લાઇટ્સને સુરક્ષા ચેતવણી મળી હતી અને વ્યાપક નિરીક્ષણ પછી, તમામ સંબંધિત વિમાનોને સેવામાં પાછા મૂકવામાં આવ્યા છે. આ સપ્તાહની શરૂઆતમાં, નાગરિક ઉડ્ડયન મંત્રી કે. રામમોહન નાયડુએ કહ્યું હતું કે સરકાર એરલાઇન્સને બોમ્બની ધમકીઓનો સામનો કરવા માટે આ પ્રકારની ધમકીઓ જારી કરનારાઓને એર પ્રતિબંધની સૂચિમાં મૂકવા સહિત કાયદાકીય કાર્યવાહી કરવાની યોજના બનાવી રહી છે.