DRDO Hypersonic Missile Successfully Tests: હાઇપરસોનિક મિસાઇલ : ભારત રક્ષાના ક્ષેત્રમાં સમય સાથે સતત પ્રગતિ હાંસલ કરી રહ્યું છે. ડીઆરડીઓ એ રવિવારે ઓડિશાના દરિયાકિનારે એપીજે અબ્દુલ કલામ ટાપુ પરથી લાંબા અંતરની હાઇપરસોનિક મિસાઇલનું સફળ પરીક્ષણ કર્યું હતું. આ સફળ પરીક્ષણ બાદ કેન્દ્રીય રક્ષા મંત્રી રાજનાથ સિંહે ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (ડીઆરડીઓ)ને અભિનંદન પાઠવ્યા છે.
સંરક્ષણ પ્રધાન રાજનાથસિંહે સોશિયલ મીડિયા પ્લેટફોર્મ એક્સ પર એક પોસ્ટમાં જણાવ્યું હતું કે, ઓડિશાના દરિયાકાંઠે આવેલા ડો. એપીજે અબ્દુલ કલામ ટાપુ પરથી લાંબા અંતરની હાયપરસોનિક મિસાઇલનું સફળતાપૂર્વક પરીક્ષણ કરીને ભારતે એક મોટી સિદ્ધિ હાંસલ કરી છે. આ એક ઐતિહાસિક ક્ષણ છે અને આ નોંધપાત્ર સિદ્ધિએ આપણા દેશને આવી મહત્વપૂર્ણ અને અદ્યતન લશ્કરી તકનીકો ધરાવતા રાષ્ટ્રોના પસંદગીના જૂથમાં સ્થાન આપ્યું છે. હું ડીઆરડીઓ ટીમને અભિનંદન આપું છું. હું આપણા સશસ્ત્ર દળો અને ઉદ્યોગોને તેમની અદભૂત સિદ્ધિઓ બદલ અભિનંદન આપું છું.
તમને જણાવી દઇયે કે, આ મિસાઇલનું પરીક્ષણ ડીઆરડીઓ અને સશસ્ત્ર દળોના વરિષ્ઠ વૈજ્ઞાનિકોની હાજરીમાં કરવામાં આવ્યું છે. આ પરીક્ષણમાં હાઇપરસોનિક ટેકનોલોજી અને લાંબા અંતરના હથિયારોમાં ભારતની ક્ષમતાઓ દર્શાવવામાં આવી છે.
હાઇપરસોનિક મિસાઇલની ખાસયિત
હવે વાત કરીએ હાઇપરસોનિક મિસાઇલની ખાસિયતની તો તે અવાજની સ્પીડથી ઓછામાં ઓછી પાંચ ગણી (1235 કિલોમીટર પ્રતિ કલાક) સ્પીડથી ઉડી શકે છે. તેની ન્યૂનતમ સ્પીડ 6174 કિલોમીટર પ્રતિ કલાક છે. એટલું જ નહીં, આ મિસાઇલ ક્રૂઝ અને બેલેસ્ટિક બંને ફીચર્સથી સજ્જ છે. તે વિવિધ પેલોડ વહન કરવામાં અને કોઈપણ પરિસ્થિતિમાં કામગીરી કરવામાં સક્ષમ છે. લાંબા અંતરની આ મિસાઇલ દુશ્મનના રડારને ચકમો આપી શકે તેવી ટેકનોલોજીથી પણ સજ્જ છે.
મીડિયા રિપોર્ટ્સ અનુસાર, હાલમાં દુનિયાના માત્ર પાંચ દેશો પાસે હાઇપરસોનિક મિસાઇલ, અમેરિકા, રશિયા, ચીન, ફ્રાન્સ અને ભારત જેવી ક્ષમતા છે. જો કે ઇરાનથી આવી મિસાઇલોના પરીક્ષણની માહિતી પણ બહાર આવી રહી છે. આ દેશો ઉપરાંત બ્રિટન, ઇઝરાયેલ, બ્રાઝિલ અને દક્ષિણ કોરિયામાં પણ આ ટેકનોલોજી વિકસાવવામાં આવી રહી છે.
