Manipur violence, today bandh : મણિપુરની સ્થિતિ ફરી એકવાર ખરાબ દેખાઈ રહી છે. જ્યાં બે વિદ્યાર્થીઓની હત્યા બાદ રોષ ફેલાયો છે. કેન્દ્રીય તપાસ એજન્સીઓએ ચાર આરોપીઓની પણ ધરપકડ કરી છે. એનઆઈએએ શનિવારે મ્યાનમાર અને બાંગ્લાદેશ સ્થિત આતંકવાદી સંગઠનો દ્વારા ભારત સરકાર સામે યુદ્ધ કરવા માટેના આંતરરાષ્ટ્રીય કાવતરાને લગતા કેસમાં ચુરાચંદપુરના પહાડી જિલ્લામાંથી 51 વર્ષીય વ્યક્તિની પણ ધરપકડ કરી હતી. ઈન્ડીજીનિયસ ટ્રાઈબલ લીડર્સ ફોરમ (આઈટીએલએફ) અને અન્ય આદિવાસી સંગઠનો હત્યા કેસમાં ચાર આરોપીઓની ધરપકડના વિરોધમાં બહાર આવ્યા છે અને આ સંગઠનોએ સોમવાર, 2 ઓક્ટોબરના રોજ સવારે 10 વાગ્યાથી ચૂરાચંદપુર જિલ્લામાં સંપૂર્ણ બંધનું એલાન આપ્યું છે.
બંધ કરવાની જાહેરાત
નેશનલ ઇન્વેસ્ટિગેશન એજન્સી (NIA) અને સેન્ટ્રલ બ્યુરો ઑફ ઇન્વેસ્ટિગેશન (CBI) દ્વારા બે સગીર સહિત કુકી સમુદાયના લોકોની ધરપકડના જવાબમાં વિવિધ નાગરિક સમાજ સંગઠનોની સંયુક્ત બેઠક ચુરાચંદપુરમાં યોજાઈ હતી. આ પછી નિર્ણય લેવામાં આવ્યો કે 2 ઓક્ટોબર, 2023ના રોજ સવારે 10 વાગ્યાથી અનિશ્ચિત સમય માટે બંધ રહેશે. આ સંસ્થાઓના પ્રતિનિધિઓ વચ્ચે ચર્ચા બાદ આ નિર્ણય લેવામાં આવ્યો છે. બેઠક દરમિયાન અનેક દરખાસ્તો પણ કરવામાં આવી હતી.
આ દરમિયાન બંધને લઈને સૌથી મોટો નિર્ણય લેવામાં આવ્યો છે. આ ઉપરાંત જે લોકોની ધરપકડ કરવામાં આવી છે તેમને જલ્દી મુક્ત કરવાની માંગ કરવામાં આવી છે. NIA અને CBIને ઔપચારિક રીતે 48 કલાકની અંદર સાત લોકોને મુક્ત કરવા વિનંતી કરવામાં આવી છે. જો આમ કરવામાં નહીં આવે તો, નાગરિક સમાજ સંગઠનોએ મણિપુરના તમામ પહાડી જિલ્લાઓમાં વધુ જોરદાર વિરોધ પ્રદર્શન કરવાની ચેતવણી આપી છે.
આ દરમિયાન સરહદ સીલ કરવાની ચેતવણી પણ આપવામાં આવી છે. આ સંગઠનોએ કહ્યું છે કે આગામી દિવસથી મેઇતેઈ સમુદાય સાથે જોડાયેલા તમામ સરહદી વિસ્તારોને સીલ કરી દેવામાં આવશે. આ કાર્યવાહીનો ઉદ્દેશ્ય આ બફર ઝોનમાં અને બહાર વ્યક્તિઓની હિલચાલને પ્રતિબંધિત કરવાનો છે. વધુમાં, આ સમયગાળા દરમિયાન તમામ સરકારી કચેરીઓ બંધ રહેશે.
