How To Increase Hemoglobin Level Quickly : હિમોગ્લોબિન એક મહત્વપૂર્ણ પ્રોટીન છે, જે લોહીમાં ઓક્સિજનનું વહન કરવાનું કામ કરે છે. તે લોહીને લાલ રંગ આપે છે અને શરીરના દરેક ભાગમાં ઓક્સિજન પહોંચાડવાનું કામ કરે છે. આ ઉપરાંત તે કોશિકાઓ માંથી કાર્બન ડાયોક્સાઈડને દૂર કરીને તેને દૂર કરવા માટે ફેફસામાં લઈ જવાનું કામ કરે છે. જ્યારે શરીરમાં લાલ રક્તકણોની સંખ્યા ઘટે છે, ત્યારે લાલ રક્તકણો અથવા હિમોગ્લોબિનમાં ઘટાડો થાય છે. જો કે સ્ત્રીઓ અને પુરુષો બંનેમાં હિમોગ્લોબિનનું પ્રમાણ ઓછું હોઈ શકે છે, પરંતુ સ્ત્રીઓમાં આયર્નની ઉણપ અને એનીમિયા પુરુષો કરતા વધુ જોવા મળે છે.
શરીરમાં હિમોગ્લોબિન ઘટવાથી થાક, નબળાઈ અને સ્વાસ્થ્ય સંબંધિત બીજી ઘણી સમસ્યાઓ થઈ શકે છે. એઈમ્સના ભૂતપૂર્વ સલાહકાર અને સાઓલ હાર્ટ સેન્ટરના સ્થાપક અને ડિરેક્ટર ડો.વિમલ ઝાંઝરે હિમોગ્લોબિન વધારવા માટે શું ખાવું તે સમજાવ્યું હતું.
વિટામિન સીથી ભરપૂર આહાર
ડો.વિમલ ઝાંઝરે જણાવ્યું હતું કે એનીમિયાથી બચવા અને હિમોગ્લોબિન વધારવા માટે ખોરાકનું ધ્યાન રાખવું જોઈએ, જે એનીમિયાને દૂર કરવામાં અને શરીરને સ્વસ્થ રાખવામાં મદદરૂપ થાય છે. હિમોગ્લોબિનને કુદરતી રીતે વધારવા માટે નારંગી, લીંબુ, મીઠા લીંબુ, સ્ટ્રોબેરી, બેલ મરી, ટામેટા જેવા ખાટા ફળોનું સેવન કરવું જોઇએ. ખાટા ફળોમાં વિટામિન સી ભરપૂર માત્રામાં હોય છે.
લીલા પાંદડાવાળા શાકભાજી
ફોલિક એસિડ શરીરમાં હિમોગ્લોબિનનું સ્તર વધારવા માટે ખૂબ જ મહત્વપૂર્ણ છે. પાલક, મેથી અને સરસવની ભાજી જેવા લીલા પાંદડાવાળા શાકભાજીમાં આયર્ન અને ફોલિક એસિડ ભરપૂર માત્રામાં હોય છે. આ તત્વો હિમોગ્લોબિનની રચનામાં મદદ કરે છે અને લોહીની ખોટને દૂર કરી શકે છે.
કઠોળ દાળ
શરીરમાં લોહીની કમી દૂર કરવા માટે પણ કઠોળનું સેવન ખૂબ ફાયદાકારક સાબિત થઈ શકે છે. ચણા, મગ, રાજમા અને સોયાબીન જેવા કઠોળમાં આયર્ન અને પ્રોટીન ભરપૂર માત્રામાં હોય છે. તેમનું નિયમિત સેવન શરીરમાં હિમોગ્લોબિન લેવલ જાળવી રાખવામાં મદદરૂપ થાય છે.
ફળ
સફરજન અને દાડમ જેવા ફળો શરીરમાં લોહી વધારવાનું કામ કરે છે. સફરજનને તંદુરસ્ત જીવનશૈલીનું પ્રતીક માનવામાં આવે છે. તેમાં રહેલું આયર્ન, પોટેશિયમ અને વિટામિન સી લોહીની ઉણપને ઘટાડવામાં મદદ કરે છે. તેમના સેવનથી આયર્ન અને વિટામિન સીનું યોગ્ય સંતુલન થાય છે. દાડમનો રસ અથવા સફરજનના સેવનથી લોહીની ખોટ દૂર થાય છે અને હિમોગ્લોબિન વધારવામાં મદદ મળે છે. તેઓ લોહીમાં લાલ રક્તકણોની સંખ્યા વધારે છે અને શરીરને ઉર્જા આપવાનું કામ કરે છે.
શરીરમાં હિમોગ્લોબિન કેટલું હોવું જોઈએ?
શરીરમાં હિમોગ્લોબિનનું લેવલ હંમેશાં સારું હોવું જોઈએ, કારણ કે હિમોગ્લોબિન ઓછું હોય ત્યારે સ્વાસ્થ્ય સંબંધિત ઘણી સમસ્યાઓનો ખતરો રહે છે. પુરુષોમાં 13.8 થી 17.2 g/dL, મહિલાઓમાં 12.1થી 15.1 g/dL અને બાળકોમાં 11થી 16 g/dL હોવું જોઈએ. તેની ઉણપથી આયર્નની ઉણપ, બ્લીડિંગ, ક્રોનિક ડિસીઝ અને ફિક્કી સ્કિન જેવી સમસ્યાઓ થઈ શકે છે.
