Gujarat Rain Weather Forecast Update : રાજ્યમાં વરસાદનો નવા રાઉન્ડ શરુ થયો છે. જેના કારણે ખેડૂતોને રાહત થઇ છે. ગુરુવારને 14 ઓગસ્ટના રોજ સવારના 6.00 થી સાંજના 6.00 વાગ્યા સુધીમાં 34 તાલુકામાં વરસાદ નોંધાયો છે. જેમાં સૌથી વધારે ગીર સોમનાથના સુત્રાપાડામાં 2.83 ઇંચ વરસાદ વરસ્યો છે.
34 તાલુકામાં વરસાદ
સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં ગુરુવારને 14 ઓગસ્ટના રોજ સવારના 6 થી સાંજના 6 વાગ્યા સુધીમાં 34 તાલુકામાં વરસાદ વરસ્યો છે. જેમાં સુત્રાપાડામાં 72 મીમી, માળિયા હાટીનામાં 39 મીમી, વેરાવળમાં 28 મીમી, વઘઇમાં 25 મીમી, જેતપુરમાં 23 મીમી, કોડીનારમાં 22 મીમી, કેશોદમાં 18 મીમી, વિસાવદરમાં 16 મીમી, મેંદરડામાં 15 મીમી, કુકાવાવ વાડીયામાં 11 મીમી અને ભાણવડમાં 10 મીમી વરસાદ વરસ્યો છે. આ સિવાય અન્ય 23 તાલુકામાં 1 થી લઇને 9 મીમી સુધી વરસાદ નોંધાયો છે.
હવામાન વિભાગની આગાહી
હવામાન વિભાગના મતે ગુજરાતમાં 19 ઓગસ્ટ સુધી ઘણા જિલ્લાઓમાં ભારે વરસાદની આગાહી છે. બંગાળની ખાડીમાં લો પ્રેશર સિસ્ટમ, કચ્છ પર અપર એર સાયક્લોનિક સર્ક્યુલેશન, પૂર્વ પશ્ચિમ મોન્સૂન ટ્રફ સહિત ચાર સિસ્ટમ સક્રિય છે. જેના કારણે વરસાદની તીવ્રતા વધશે.
શુક્રવારે 15મી ઓગસ્ટે સ્વતંત્રતા દિવસે અમદાવાદ, ગાંધીનગર, સાબરકાંઠા, બનાસકાંઠા, મહેસાણા, પાટણ, વડોદરા, સુરત, ડાંગ, તાપી, નવસારી, વલસાડ, ભરૂચ, નર્મદા, છોટા ઉદેપુર અરવલ્લી, ખેડા અને આણંદનાં અમુક સ્થળોએ ભારે વરસાદ પડવાની પ્રબળ શક્યતા છે. સોરાષ્ટ્રના રાજકોટ, જામનગર, ભાવનગર, જૂનાગઢ, સુરેન્દ્રનગર સહિતના વિસ્તારોમાં અમુક સ્થળોએ 30થી 40 કિલોમીટરની ઝડપે પવન ફૂંકાશે તથા ગાજવીજ સાથે હળવોથી મધ્યમ વરસાદ પડશે.
આ પણ વાંચો – લો બોલો! સુરતમાં વર્ષ 2021 માં જે સ્કૂટર ચોરાઈ ગયું, તે વ્યક્તિને ટ્રાફિક ઉલ્લંઘન બદલ તેનું ઈ-ચલણ મળ્યું
રાજ્યમાં સિઝનનો કુલ 64.78 ટકા વરસાદ
14 ઓગસ્ટ 2025 સુધીમાં રાજ્યમાં સિઝનનો કુલ 64.78 ટકા વરસાદ નોંધાયો છે. જેમાં કચ્છમાં 65.36 ટકા, ઉત્તર ગુજરાતમાં 66.22 ટકા, પૂર્વ મધ્ય ગુજરાતમાં 66.71 ટકા, સૌરાષ્ટ્રમાં 56.93 ટકા અને દક્ષિણ ગુજરાતમાં 69.36 ટકા વરસાદ વરસ્યો છે.
સરદાર સરોવર નર્મદા નિગમ લી. માં 14 ઓગસ્ટને સાંજના 4 વાગ્યા સુધીમાં પાણીનો સંગ્રહ 250536 mcft છે. જે કુલ સંગ્રહ ક્ષમતાના 74.99% જેટલી છે. રાજ્યના અન્ય 206 જળાશયોમાં સંગ્રહ 391956 mcft છે. જે કુલ સંગ્રહ ક્ષમતાના 70.26% છે. 100 ટકા ભરાયેલ ડેમોની સંખ્યા 30 છે. 51 ડેમ હાઇ એલર્ટ પર અને 25 ડેમ એલર્ટ પર છે.
