Startup India : 16 જાન્યુઆરી રાષ્ટ્રીય સ્ટાર્ટઅપ દિવસ ની ઉજવણીના ભાગ રૂપે, DPIIT એ નેશનલ સ્ટાર્ટઅપ એવોર્ડ્સ 2023 અને રાજ્યોના સ્ટાર્ટઅપ રેન્કિંગ ફ્રેમવર્કની 4ઠ્ઠી આવૃત્તિના વિજેતાઓની જાહેરાત કરી હતી, જે સ્ટાર્ટઅપ ઇન્ડિયા હેઠળની બે મુખ્ય પહેલ છે. આ અન્વયે ગુજરાતે સતત ચોથી વાર સ્ટાર્ટઅપ રેન્કિંગમાં બેસ્ટ પર્ફોર્મર સ્ટેટનું ગૌરવ મેળવ્યું છે.
સ્ટાર્ટઅપ ઈન્ડિયા રેન્કિંગમાં ગુજરાત સતત ચોથી વખત બેસ્ટ પરફોર્મર સ્ટેટ
આ પ્રસંગે ગુજરાત સીએમ ભૂપેન્દ્ર પટેલે આ ગૌરવ સિદ્ધિ પ્રાપ્ત કરવા માટે રાજ્ય સરકારના ઉદ્યોગ વિભાગ અને સ્ટાર્ટઅપ ઇકો સિસ્ટમ સાથે સંકળાયેલા ઉદ્યોગ સાહસિકોને અભિનંદન પાઠવ્યા હતા.
તમને જણાવી દઈએ કે, નેશનલ સ્ટાર્ટઅપ-ડે ના અવસરે નવી દિલ્હીમાં સ્ટાર્ટઅપ રેન્કિંગ-૨૦૨૨ના પરિણામોનું અનાવરણ કેન્દ્રીય ઉદ્યોગ અને વાણિજ્ય મંત્રી પિયુષ ગોયલે કર્યું હતું.
ભારતમાં કેટલા સ્ટાર્ટઅપ હબ
પીએમ મોદીએ આત્મનિર્ભર ભારતના ધ્યેયને પાર પાડવા દેશમાં મજબૂત ઉદ્યોગ સાહસિક ઇકોસિસ્ટમને પ્રોત્સાહન આપવા 16 જાન્યુઆરી, 2016ના રોજ આ ‘સ્ટાર્ટઅપ ઇન્ડિયા’ પહેલ શરૂ કરાવી હતી. આના પરિણામ સ્વરૂપે ભારત આજે વિશ્વમાં 1 લાખ 17 હજાર જેટલા માન્ય સ્ટાર્ટઅપ અને 111 યુનિકોર્ન સ્ટાર્ટઅપ ધરાવતું સૌથી મોટું સ્ટાર્ટઅપ હબ બન્યું છે.
દેશના અન્ય રાજ્યોમાં પણ ઇનોવેશન્સ અને ઉદ્યોગ સાહસિકતાને વધુ પ્રેરિત કરવા પીએમ મોદીએ કેન્દ્ર સરકારના ડિપાર્ટમેન્ટ ફોર પ્રમોશન ઓફ ઇન્ડસ્ટ્રી એન્ડ ઇન્ટરનલ ટ્રેડ-DPIIT દ્વારા વર્ષ ૨૦૧૮થી રાજ્યો માટે સ્ટાર્ટઅપ રેન્કિંગ ફ્રેમવર્ક શરૂ કરવામાં આવ્યું છે.
ગુજરાતમાં કેટલા સ્ટાર્ટઅપ
ગુજરાતમાં 9200 થી વધુ માન્યતા પ્રાપ્ત સ્ટાર્ટઅપ્સ છે. એટલું જ નહીં, રાજ્ય સરકારે યુવા ઉદ્યોગ સાહસિકોને પ્રારંભિક સ્તરે સહાય માટે રૂ. 1 હજાર કરોડના ભંડોળ સાથે ‘ગુજરાત યંગ એન્ટરપ્રેન્યોર્સ વેન્ચર ફંડ’ શરૂ કરીને પ્રોત્સાહન પણ પૂરું પાડ્યું છે. આ ઉપરાંત સસ્ટેઇનન્સ એલાઉન્સ, ઇન્ફ્રાસ્ટ્રક્ચર આસિસ્ટન્સ, મોનિટરીંગ આસિસ્ટન્સ અને માર્કેટીંગ એલાઉન્સ જેવી સુવિધા સહાય પણ આપવામાં આવે છે.
મુખ્યમંત્રી ભૂપેન્દ્ર પટેલના નેતૃત્વમાં રાજ્યમાં સ્ટાર્ટઅપને વધુ વ્યાપક અને વેગવાન બનાવવા રાજ્ય સરકારે મહત્વ આપ્યું છે. તાજેતરમાં સંપન્ન થયેલી વાઈબ્રન્ટ ગુજરાત સમિટ-2024ની પ્રિ-વાઈબ્રન્ટ ઈવેન્ટરૂપે સ્ટાર્ટઅપ કોન્ક્લેવ તથા વાઈબ્રન્ટ સમિટ દરમિયાન સ્ટાર્ટઅપ એન્ડ ઈનોવેશન સેમિનારનું પણ સફળતાપૂર્વક આયોજન કરવામાં આવ્યું હતું.
સરકાર તરફથી સ્ટાર્ટઅપ માટે શું લાભ વ્યવસ્થા છે
માન્યતા પ્રાપ્ત સંસ્થાઓ સરકાર તરફથી બહુવિધ લાભો માટે પાત્ર છે જેમાં શ્રમ કાયદાઓ અને પર્યાવરણીય કાયદાઓનું પાલન સ્વ-પ્રમાણપત્ર, પેટન્ટ અરજીઓમાં સહાય, આવકવેરા કાયદાની કલમ 80IAC હેઠળ કર મુક્તિ અને વધુનો સમાવેશ થાય છે.
આ સિવાય અત્યાર સુધીમાં, 2,977 આવકવેરા મુક્તિ આપવામાં આવી છે અને 3,658 સ્ટાર્ટઅપ્સને SIDBI ફંડ ઓફ ફંડ્સ સ્કીમ હેઠળ ભંડોળ પૂરું પાડવામાં આવ્યું છે, જે 2016 માં રૂ. 10,000 કરોડના ભંડોળ સાથે સ્થાપિત કરવામાં આવી હતી. આ યોજના SEBI-રજિસ્ટર્ડ વૈકલ્પિક રોકાણ ફંડ્સ (AIFs) ને મૂડી પૂરી પાડે છે, જે પુત્રી ભંડોળ તરીકે ઓળખાય છે, જે બદલામાં ઇક્વિટી અને ઇક્વિટી-લિંક્ડ ઇન્સ્ટ્રુમેન્ટ્સ દ્વારા સ્ટાર્ટઅપ્સમાં નાણાંનું રોકાણ કરે છે.
ફંડ ઓફ ફંડ સ્કીમ સિવાય, સ્ટાર્ટઅપ ઈન્ડિયા પ્રોગ્રામમાં સ્ટાર્ટઅપ્સને ખ્યાલ, પ્રોટોટાઈપ ડેવલપમેન્ટ, પ્રોડક્ટ ટ્રાયલ, માર્કેટ એન્ટ્રી અને વ્યાપારીકરણના પુરાવા માટે નાણાકીય સહાય પૂરી પાડવા માટે બીજ ફંડ યોજનાનો પણ સમાવેશ થાય છે, અને SEBI રજિસ્ટર્ડ AIFs હેઠળ બેંકો, NBFCs, વેન્ચર ડેટ ફંડ્સ દ્વારા DPIIT-માન્યતા પ્રાપ્ત સ્ટાર્ટઅપ્સને આપવામાં આવેલી લોન માટે ક્રેડિટ ગેરંટી પૂરી પાડવા માટે ક્રેડિટ ગેરંટી સ્કીમ.
ગુજરાત સરકાર દ્વારા સ્ટાર્ટઅપ માટે પ્રોત્સાહન
ગુજરાતમાં શાળાકીય શિક્ષણ સ્તરેથી જ વિદ્યાર્થી યુવાઓમાં ઉદ્યોગ સાહસિકતા ક્ષમતા વિકસાવવા શિક્ષણ વિભાગે ‘સ્ટુડન્ટ સ્ટાર્ટઅપ એન્ડ ઇનોવેશન પોલીસી 2.0’ લોન્ચ કરેલી છે. તેનાથી પણ સ્ટાર્ટઅપ માટે નવું વાતાવરણ ઊભું થયું છે. આ ઉપરાંત સાયન્સ એન્ડ ટેક્નોલોજી, બાયોટેક્નોલોજી, ઉચ્ચ અને ટેકનિકલ શિક્ષણ જેવા વિભાગો દ્વારા પણ સ્ટાર્ટઅપને પ્રોત્સાહક વાતાવરણ પૂરું પાડવામાં આવી રહ્યું છે.
આ પણ વાંચો – ગુજરાતમાં ટ્રાફિક નિયમ ભંગમાં થશે કડક કાર્યવાહી, પોલીસ આપશે ઈ-ચલણ, જો દંડ ન ભર્યો તો જેલમાં પણ જવું પડશે
આ પહેલા પણ ગુજરાતને એવોર્ડ મળી ચૂક્યો છે
ઉલ્લેખનીય છે કે, રાજ્ય સરકારને સ્ટાર્ટઅપ ઇન્ડિયા પ્રોગ્રામના સફળતાપૂર્વકના અમલીકરણ માટે ૨૦૧૭માં પ્રાઇમ મિનિસ્ટર એવોર્ડ ફોર એક્સેલેન્સ ઈન પબ્લિક એડમિનિસ્ટ્રેશન પણ એનાયત થયેલો છે.
સીએમ ભૂપેન્દ્ર પટેલે શું કહ્યું
ભૂપેન્દ્ર પટેલ આ પ્રસંગે કહ્યું કે, હું તમામ યુવા ઉદ્યોગ સાહસિકોનો આભાર વ્યક્ત કરૂ છુ. રાજ્ય સરકાર ‘આઇ ક્રિએટ’ દ્વારા યુવા ઉદ્યોગ સાહસિકોને ઇન્કયુબેશન સપોર્ટ આપીને પણ રાજ્યમાં સ્ટાર્ટઅપ ઇકો સિસ્ટમને વધુ વ્યાપક બનાવવા પ્રતિબદ્ધ છે. તમારા બધાની ફલશ્રુતિએ ગુજરાત સ્ટાર્ટઅપ રેન્કિંગમાં સતત ચોથી વાર અગ્રેસર રાજ્ય બન્યું છે.
