IIT Gandhinagar Students Developed Driverless Vehicle : ઇન્ડિયન ઇન્સ્ટિટ્યૂટ ઑફ ટેક્નોલોજી ગાંધીનગર (IITGN) ના 10 વિદ્યાર્થીઓએ સંપૂર્ણ કાર્યક્ષમ વાહન વિકસાવ્યું છે, જે ડ્રાઇવર વિના ચલાવી શકાય છે.
ગાંધીનગર આઈઆઈટી વિદ્યાર્થીઓએ બનાવ્યું ડ્રાઈવર લેસ વાહન
આ વાહન ‘ઓટોનોમસ વ્હીકલ’ પરના તેમના અભ્યાસક્રમના ભાગ રૂપે વિકસાવવામાં આવ્યું હતું. જાન્યુઆરીથી મે સુધીના એક સત્રમાં, વિદ્યાર્થીઓએ ઇલેક્ટ્રિક ગોલ્ફ કાર્ટને ડ્રાઇવર લેસ વાહનમાં રૂપાંતરિત કર્યું, જે સમગ્ર કેમ્પસમાં – હોસ્ટેલથી શૈક્ષણિક વિસ્તાર સુધી સ્વાયત્ત રીતે નેવિગેટ કરવા સક્ષમ છે.
અભ્યાસક્રમના પ્રશિક્ષક, પ્રોફેસર હરીશ પીએમએ જણાવ્યું હતું કે, “વિદ્યાર્થીઓએ એક પડકારજનક કાર્ય કર્યું, જેમાં ઘણી અદ્યતન તકનીકોના વાસ્તવિક-વિશ્વના અમલીકરણનો સમાવેશ થાય છે. તેઓએ આટલા ટૂંકા સમયમાં સફળતાપૂર્વક (પ્રોજેક્ટ) અમલમાં મૂક્યો.”
ભવિષ્યમાં આવી જગ્યાઓ પર થઈ શકે છે ઉપયોગ
તેમણે કહ્યું કે, “ઓટોનોમસ કાર ઝડપથી પરિપક્વ થઈ રહી છે અને અમે તેને એરપોર્ટ, કેમ્પસ, મોલ્સ અને અન્ય નિયંત્રિત વાતાવરણમાં, સાથે તમામ રસ્તાઓ પર ડ્રાઇવિંગ કરતી જોવામાં લાંબો સમય નહીં લાગે.”
ડ્રાઈવર લેસ વ્હીકલમાં કેવી ટેક્નોલોજીનો સમાવેશ કરાયો
વિદ્યાર્થીઓએ રેગ્યુલર કેમેરા, ડેપ્થ કેમેરા અને લિડર સહિતના સેન્સરથી કારને સજ્જ કરી છે. તેઓ હાર્ડવેર ફેરફારોની શ્રેણીને પણ સમાવિષ્ટ કરે છે, જેમાં સ્ટીયરીંગ મિકેનિઝમ, બ્રેકીંગ મિકેનિઝમ, એક્સિલરેશન કંટ્રોલ સિસ્ટમ તેમજ એલ્ગોરિધમનો સમાવેશ થાય છે. આ ફેરફારોએ વાહનને સંપૂર્ણપણે સ્વાયત્ત (ઓટોમેટિક) કામગીરી માટે સક્ષમ બનાવ્યું, જેમાં લેન અને અવરોધ શોધી, સ્વચાલિત સ્ટીયરિંગ નિયંત્રણ તેમજ સ્વચાલિત બ્રેકિંગ અને પ્રવેગકનો સમાવેશ થાય છે.
65,000 રૂપિયાના બજેટમાં કર્યું તૈયાર
10 વિદ્યાર્થીઓ – મિકેનિકલ એન્જિનિયરિંગ વિભાગના નવ અને કેમિકલ એન્જિનિયરિંગમાંથી એક – તેમણે ગેસ્ટ લેક્ચરર્સ, IITGN લેબોરેટરી સ્ટાફ અને ટીચિંગ આસિસ્ટન્ટ્સ તરફથી સપોર્ટ અને માર્ગદર્શન મેળવ્યું. તેમનું બજેટ આશરે રૂ. 65,000 (વાહન અને કમ્પ્યુટર સિવાય) હતું.
સાનિયા પટવર્ધન, એક વિદ્યાર્થી, જેણે પ્રોજેક્ટ પર કામ કર્યું હતું, તેણે જણાવ્યું હતું કે, “આ એક ખુબ સમય માંગી લેતો પ્રોજેક્ટ હતો, જેમાં ખૂબ જ સમર્પણ અને સાવચેત આયોજનની જરૂર હતી.”
10 વિદ્યાર્થીઓમાંના એક રાહુલ પાઈએ જણાવ્યું હતું કે, “સિદ્ધાંત લાગુ કરવાથી લઈને એક અદ્ભુત ટીમ સાથે સહયોગ કરવા સુધી, દરેક પગલું સંતોષકારક રહ્યું છે. અમે કરેલી તમામ મહેનત પછી અમારા વાહનને રસ્તાઓ પર સ્વાયત્ત રીતે આગળ વધતા જોઈને અમને આનંદ થયો.”
આ પણ વાંચો – ગુજરાત હાઈકોર્ટે જમીન હડપ કરવાના કાયદાની બંધારણીય માન્યતાને આપ્યું સમર્થન, પડકાર અરજીઓ ફગાવી
છેલ્લા કેટલાક અઠવાડિયામાં, વિદ્યાર્થીઓએ IITGN કેમ્પસના રસ્તાઓ પર વાસ્તવિક જીવનમાં વાહનનું સફળતાપૂર્વક પરીક્ષણ કર્યું છે. વધુમાં, તેઓએ સલામતીના ઘણા પગલાં લીધાં છે. વિદ્યાર્થીઓ હવે આશા રાખે છે કે, તેમની આગામી બેચ આગામી સત્રમાં તમામ વિદ્યાર્થીઓ માટે રોજિંદી સેવા તરીકે પ્રોજેક્ટને રોલ આઉટ કરી શકે છે.
