Form 16 Changes for Salaried Employee: ઈન્કમ ટેક્સ રિટર્ન ફાઈલ કરવાની પ્રક્રિયા શરૂ થઇ ગઇ છે. પગારદાર કરદાતા થી લઇ વેપારીઓ અને કંપનીઓએ દર વર્ષે સમયસર આઈટીઆર ફાઇલ કરવું જરૂરી છે. પગારદાર કરદાતાઓ માટે ITR ફાઇલ કરવા માટે ફોર્મ 16 સૌથી મહત્વપૂર્ણ દસ્તાવેજ છે. દર વર્ષની જેમ આ વખતે પણ નોકરીદાતાઓએ 15 જૂન સુધીમાં તેમના કર્મચારીઓને ફોર્મ ૧૬ જારી કરવાનું રહેશે. ઘણા કર્મચારીઓને તેમનું ફોર્મ 16 મળી ગયું હશે. પરંતુ આ વખતે ફોર્મ 16માં કેટલાક નવા ફેરફારો કરવામાં આવ્યા છે, જે આઈટી રિટર્ન ફાઇલિંગને સરળ અને પારદર્શક બનાવવામાં ખૂબ અસરકારક છે. અમે આ ફેરફારો વિશે પછીથી માહિતી આપીશું, પરંતુ નવા કરદાતાઓની સુવિધા માટે, ચાલો પહેલા સમજીએ કે ફોર્મ 16 શું છે.
What Is Farm 16? : ફોર્મ 16 શું છે?
ફોર્મ 16 એ એક પ્રમાણપત્ર છે જે તમને તમે જ્યાં નોકરી કરો છો તે કંપની કે પેઢી તરફથી મળે છે. આ ડોક્યુમેન્ટમાં કર્મચારીના પગાર, તેના પર કાપવામાં આવેલ ટેક્સ ડિડક્ટેડ એટ સોર્સ (TDS) અને તમારા ટેક્સ સંબંધિત બધી મહત્વપૂર્ણ માહિતી શામેલ છે. તે બે ભાગમાં વહેંચાયેલું છે – ભાગ A અને ભાગ B.
ભાગ A માં નોકરીદાતાએ તમારા પગારમાંથી કાપીને આવકવેરા વિભાગમાં જમા કરાવેલા TDS ની વિગતો શામેલ છે. તેમાં તમારો PAN, નોકરીદાતાનો TAN અને ત્રિમાસિક ધોરણે કર કપાતનો રેકોર્ડ શામેલ છે.
ભાગ B માં તમારા પગાર, કરપાત્ર આવક અને 80C, 80D જેવા વિભાગો હેઠળ ઉપલબ્ધ મુક્તિઓ અને કપાતનું સંપૂર્ણ વિભાજન શામેલ છે.
Changes In Form 16 : આ વર્ષે ફોર્મ 16 માં શું ફેરફાર થયા છે?
આ વખતે આવકવેરા વિભાગે ફોર્મ 16 ને વધુ વિગતવાર અને સ્પષ્ટ બનાવ્યું છે. હવે તેમાં કેટલીક નવી માહિતીનો સમાવેશ કરવામાં આવ્યો છે જે કરદાતાઓને ITR ફાઇલ કરવામાં ઘણી મદદ કરશે:
- કરમુક્ત અને કરપાત્ર ભથ્થા વિશેની માહિતી અલગથી બતાવવામાં આવશે, જેથી કોઈ મૂંઝવણ ન રહે.
- નવી અને જૂની કર પ્રણાલીઓ અનુસાર સ્ટાન્ડર્ડ ડિડક્શન અને NPS ડિડક્શન સંબંધિત માહિતી હવે સ્પષ્ટ થશે.
- જો કર્મચારીએ ફોર્મ 12BBA ભરીને આ વિગતો આપી હોય, તો હવે ટેક્સ કલેક્ટેડ એટ સોર્સ (TCS) સંબંધિત માહિતી ફોર્મ 16 માં પણ દેખાશે.
- હવે જો તમે તમારા એમ્પ્લોયરને અન્ય આવક વિશે માહિતી આપો છો, તો તેઓ તેના આધારે વધારાનો TDS પણ સમાયોજિત કરી શકે છે, જે પહેલા શક્ય નહોતું.
ITR ફાઇલ કરતી વખતે ફોર્મ 16 નો ઉપયોગ કેવી રીતે કરવો?
ફોર્મ 16 એ ITR ફાઇલ કરવા માટે એક માર્ગદર્શિકા જેવું છે. તેમાં આપેલી વિગતો જોઈને, તમે ITR ફોર્મમાં તમારી કુલ આવક, કપાત અને ચોખ્ખી કરપાત્ર આવકની સાચી માહિતી ભરી શકો છો.
જો તમે વર્ષ દરમિયાન નોકરી બદલી હોય, તો દરેક નોકરીદાતા પાસેથી અલગ ફોર્મ 16 મેળવવું જરૂરી છે. આ ઉપરાંત, ફોર્મ 16 માં આપેલી TDS માહિતીને ફોર્મ 26AS અને વાર્ષિક માહિતી નિવેદન (AIS) સાથે ક્રોસ-ચેક કરો. જો કોઈ આવક પર TDS કાપવામાં આવ્યો હોય અને તે તમારા ITR માં દર્શાવવામાં ન આવે, તો તમને પછીથી રિફંડ મેળવવામાં સમસ્યાનો સામનો કરવો પડી શકે છે.
ફોર્મ ૧૬ કેમ મહત્વનું છે?
ફોર્મ 16 નો ઉપયોગ ફક્ત ITR ફાઇલ કરવા માટે જ નહીં પરંતુ લોન લેવા, આવકનો પુરાવો આપવા અને ટેક્સ રિફંડનો દાવો કરવા જેવા અન્ય ઘણા હેતુઓ માટે પણ થાય છે. જો તમે વધુ ટેક્સ ચૂકવ્યો હોય, તો ફોર્મ 16 ની મદદથી તમે સરળતાથી ટેક્સ રિફંડ મેળવી શકો છો.
ફોર્મ 16 ક્યાંથી ડાઉનલોડ કરવું?
ફોર્મ 16 સામાન્ય રીતે તમને નોકરીદાતા દ્વારા આપવામાં આવે છે, પરંતુ જો તમે ઇચ્છો તો, તમે TRACES પોર્ટલ પરથી સીધા જ તમારું ફોર્મ ૧૬ ડાઉનલોડ પણ કરી શકો છો. આ માટે તમારે આ પગલાંઓનું પાલન કરવું પડશે:
- https://www.tdscpc.gov.in ની મુલાકાત લો.
- રજિસ્ટ્રેશન કરો અને પછી નોંધણી કરો અને લોગિન કરો
- ‘Downloads’ ટેબ પર જાઓ અને ‘Form 16’ પસંદ કરો.
- નાણાકીય વર્ષ અને PAN નંબર દાખલ કરો.
- TDSની વિગતો દાખલ કરો અને સબમિટ કરો.
- ડાઉનલોડ માટે રિક્વેસ્ટ સબમિટ કરો
- ડાઉનલોડ લિંક મળે ત્યારે ફોર્મ Save કરી લો.
આ પણ વાંચો | ઈન્કમ ટેક્સ રિફંડમાં વિલંબના કારણ, આ 3 રીતે તમારું TDS Refund સ્ટેટ્સ ચેક કરો
ફોર્મ 16 ડોક્યુમેન્ટ તમારી વાર્ષિક આવક અને કરની વિગતો જ નહીં, પણ યોગ્ય ITR ફાઇલ કરવામાં પણ ખૂબ ઉપયોગી છે. આ વખતે ફેરફારો તેને વધુ પારદર્શક અને સરળ બનાવી રહ્યા છે. તેથી, સમયસર તેને તપાસો, સાચી વિગતો ચકાસો અને છેલ્લી ક્ષણની રાહ જોયા વિના શાંતિથી તમારું ITR ફાઇલ કરો.
