EPFO Rules 2025: કર્મચારી ભવિષ્ય નિધિ સંગઠન (EPFO)એ આ વર્ષે પોતાના કરોડો સભ્યો માટે ઘણા મહત્વપૂર્ણ ફેરફાર કર્યા છે. આ નિયમ ફેરફાર પછી નોકરી બદલવા પર પ્રોફાઇલ અપડેટ કરવી અથવા પીએફ ટ્રાન્સફર કરવું આ તમામ કામકાજ સરળ થઇ જશે. આ ફેરફારોનો હેતુ કર્મચારીઓને વધુ સુવિધા પૂરી પાડવાનો છે. ચાલો ઇપીએફઓના નિયમ ફેરફાર વિશે સમજીએ.
નોકરી બદલવા પર પ્રોફાઇલ અપડેટ કરવું સરળ બન્યું
ઇપીએફઓમાં પીએફ સભ્ય માટે પ્રોફાઇલ અપડેટ કરવી એ હવે પહેલા કરતા વધુ સરળ છે. જો તમારું UAN આધાર સાથે લિંક છે, તો પછી તમે કોઈપણ દસ્તાવેજો વિના તમારું નામ, જન્મ તારીખ, લિંગ, માતાપિતાના નામ જેવા જરૂરી ફેરફારો એકદમ સરળતાથી ઓનલાઇન કરી શકો છો. જો તમારું યુએએન 1 ઓક્ટોબર, 2017 પહેલાંનું હોય, તો તમારે ચોક્કસ માહિતીને અપડેટ કરવા માટે તમારા એમ્પ્લોયરની મંજૂરીની જરૂર પડી શકે છે.
નોકરી બદલ્યા બાદ પીએફ બેલેન્સ ટ્રાન્સફર
હવે નોકરી બદલ્યા બાદ પીએફ બેલેન્સ ટ્રાન્સફર કરવું પણ પહેલા કરતા ઘણું સરળ થઈ ગયું છે. આ વર્ષની શરૂઆતમાં ઇપીએફઓ દ્વારા જારી કરવામાં આવેલા નવા નિર્દેશ અનુસાર, પીએફ ટ્રાન્સફર માટે કેટલાક કિસ્સાઓમાં જૂના એમ્પ્લોયરની મંજૂરી અથવા નવા એમ્પ્લોયરની મંજૂરીની જરૂર રહેશે નહીં.
જોઇન્ટ ડિક્લરેશન સરળ થયું
16 જાન્યુઆરી, 2025 ના રોજ, ઇપીએફઓએ જોઇન્ટ ડિક્લેરેશન પ્રક્રિયા માટે એક નવો પરિપત્ર બહાર પાડ્યો છે.
હવે સભ્યોને 3 કેટેગરીમાં વહેંચવામાં આવ્યા છે.
- જેમનું યુએએન આધાર આધારિત છે તેઓ ઓનલાઇન જોઇન્ટ ડિક્લેરેશન કરી શકે છે.
- જો તમારું યુએએન જૂનું છે, પરંતુ આધાર સાથે વેરિફાઇડ છે, તો તેઓ ઓનલાઇન જોઇન્ટ ડિક્લેરેશન પણ કરી શકે છે.
- જેમની પાસે UAN નથી તેમના માટે જોઇન્ટ ડિક્લેરેશનની જોગવાઈ છે.
પેન્શન ચુકવણી માટે નવી સિસ્ટમ: સેન્ટ્રલાઇઝ્ડ પેન્શન પેમેન્ટ સિસ્ટમ (CPPS)
ઇપીએફઓ એ 1 જાન્યુઆરી 2025થી નવી સિસ્ટમ સેન્ટ્રલાઇઝ્ડ પેન્શન પેમેન્ટ સિસ્ટમ (સીપીપીએસ) શરૂ કરી છે. હવે આ અંતર્ગત NPCI પ્લેટફોર્મ દ્વારા દેશના કોઈપણ બેંક ખાતામાં સીધું પેન્શન મોકલી શકાશે. આનાથી પ્રાદેશિક કચેરીઓ વચ્ચે પીપીઓ ટ્રાન્સફરની જરૂરિયાત દૂર થશે. નવું પીપીઓ જારી કરતી વખતે યુએએન આધારિત લિંક હોવી જરૂરી બનશે, જેથી ડિજિટલ લાઇફ સર્ટિફિકેટની સુવિધા લઇ શકાય. જો દાવાને ભૂલથી ખોટી ઓફિસમાં મોકલી દેવામાં આવ્યો હશે તો તેને સાચી ઓફિસમાં પરત મોકલી દેવામાં આવશે.
ઉચ્ચ પેન્શન અંગે સ્પષ્ટતા
જે પીએફ સભ્યો વધુ પગારના આધારે પેન્શન લઈ રહ્યા છે અથવા લેવા માગે છે, તેમના માટે ઈપીએફઓએ નવી પોલિસીને મંજૂરી આપી દીધી છે.
- હવે બધા માટે એક સમાન અભિગમ અપનાવવામાં આવશે.
- જે સંસ્થાઓને છૂટ આપવામાં આવી છે તેમણે ટ્રસ્ટના નિયમોનું પાલન કરવાનું રહેશે.
- આ ઉપરાંત બાકી લેણાંની વસૂલાત અને એરિયર્સ પેમેન્ટની પ્રક્રિયા અલગથી કરવામાં આવશે.
